بۆ ئێحسان

ئارام بوداغی

کرماشان میوانی سنه بوو، بێستوونیش هاته ئاویه‌ر.

ئه‌ستێره‌کانیش هاتنه ئاسمانی کوردستان و چاوه‌ڕوانی هه‌واڵت بوون.

ناو و نامه‌که‌ت دونیای هه‌ژاند. ئێمه هه‌موومان تۆ بووین و تۆش هه‌ر هه‌موومان.

ئێمه له چاوه‌ڕوانیدا و تۆ له دڵنیاییدا.

ئێمه له خه‌می تۆدا و تۆ له خه‌می کوردستاندا.

ئێمه چاومان پڕ له گریان و تۆ چاوه‌کانت ئه‌ستێره‌ن و ڕووناک ده‌که‌ن ئاسمانی ئه‌م وڵاته.

تۆ که دوژمن و جه‌للاد، زیندان و زنجیر، په‌ت و دار و مه‌رگیشت به‌زاند،

تۆ که تیشکی ناوت سنوورانی به‌زاند،

ئه‌رێ پێم ناڵێی بێستوون وره‌ی تۆیه یان وره‌ی تۆ بێستوونه؟

ئه‌گه‌ر فه‌رهاد پاڵه‌وان و ئه‌وینداری شیرینه،

تۆ قاره‌مانی و کوردستانیش بۆت شیرینه،

بۆیه ناوت له سه‌ر ترۆپکی ژینه.

سه‌رت نه‌وی ناکه‌ن به‌ند و په‌ت و دار

به چۆکتدا هێنا زاڵم و زۆردار 

لووتکه‌ی چیا و سپیداری به‌ستێنی

له پاییزدا، لێوی خونچه‌ی، مزگێنی 

سه‌رت به‌رزه و هه‌تا سه‌ر هه‌ر ده‌مێنی

له‌ لای گه‌لت بۆ ژین مایه و هه‌وێنی.

11-12/11/2009