|
به هینانی ناوی ئاستافی دهتوانن ئهم بابهته بڵاو بکهنهوه!!! |
|
وتهی ڕۆژ 2010-01-25 كۆماری ئیسلامی له 22ی رێبهندان تۆقاوه تا له 22ی رێبهندان نیزیك دهبینهوه، ترس و نیگهرانی دهسهڵاتدارانی كۆماری ئیسلامی زیاتر دهردهكهوێت. به پێی خسڵهت و چییهتی كۆماری ئیسلامی و بهڵام لهم سهردهمهدا بهرچاوتر له جاران، دهركردنی حوكمی ئیعدام، گرتن و زیندانی كردن، ههڕهشه كردن له خهڵك و به گشتی ههوڵدان بۆ بهرگری كردن له ناڕهزایهتی دهربرینی خهڵك له 22ی رێبهنداندا، زیادی كردووه. كۆماری ئیسلامی ههموو توانا و وزهی خۆی تهرخان كردووه بۆ سهركوت و، دام و دهزگاكانی سهركوتی له ههمیشه زیاتر له دژی خهڵك وهگهڕ خستووه، له ههمان كاتدا چهشنێك له شلهژان و نیگهرانیش به سیمای دهسهڵاتهوه بهدی دهكرێت و رهفتاره ههنووكهییهكانی سهلمێنهری ئهم ترسهن. ئهزموونی بۆنهكانی رابردوو و به تایبهتی رووداوهكانی رۆژی عاشورا، پهیامێكی گهورهیان بۆ سیستمی سیاسی ئێران پێ بووه، و پایهكانی دهسهڵاتی وهلهرزین خستووه و ریزشی له ناو سیستمی سیاسیدا زیاتر له ههمیشه لێ كهوتۆتهوه. ئێستا و ههر پاش رووداوهكانی رۆژی عاشورا، رژیم خۆی بۆ بهرگری كردن له نارهزایهتی دهربڕینی خهڵك له 22ی رێبهنداندا ئاماده دهكات و به مۆحارب (دژه خودا) ناوزهد كردنی نارازییانی دهستگیر كراو، دهركردنی دهیان حوكمی ئیعدام و زیندانی چهند ساڵه و ههڕهشه كردنی راستهوخۆ و ناراستهوخۆ، ههوڵهكانی بۆ دروست كردن فهزای روعب و وهحشهت له ناو خهڵكدا به پێی خهسڵهتێكی ههمیشهیی و بهڵام ئهم جاره زیاتر له ههمیشه خستۆته گهڕ. خاڵی جێگای سهرهنج لێرهدایه كه دهسهڵاته دیكتاتۆرهكان و ئێستاش دهسهڵاتدارانی كۆماری ئیسلامی، ههرگیز توانای دهرك پێ كردنی ئهم راستییهیان نییه كه ئیتر خهڵك له ئێران به چهند قات له پێش زهرفییهتهكانی ئهم دهسهڵاتهوه ههنگاو دهنێن و هیچ چهشنه سهركوت و درنده بوونێك تیماری دهردیان ناكات. 22ی رێبهندانی ئهمساڵ دهتوانێ وهك گهورهترین رێفراندۆمی سهراسهری له ئێران، جارێكی تر نهبوونی مهشروعیهتی سیستمی سیاسی ئێران بسهلمێنێت و جارێكی تر سهلماندنی كه خهڵكی ئێران تا گهیشتن به خواست و داوا بهرحهقهكانیان ماندوونهناسانه درێژه بهم رێگایه دهدن و هاوار بۆ مافهكانیان دهكهن. رهفتارهكانی ئهم دواییهی دهسهڵاتدارانی رژیم له ئاراستهی بهرگرتن به حهماسهیهكی تری خهڵكی ئێران و بۆ ئهم كارهش سڵ له هیچ له رهفتارێك ناكهن. ئهوهی كه لێرهدا گرینگ و بهرچاوه ئهوهیه كه خهڵك چ 22ی رێبهندانی ئهمساڵ بێت و چ ههر بۆنهیهكی دیكه بێت، له فهرسهتێك دهگهڕێن بۆ ئهوهی كه ناڕهزایهتی بهرامبهر به سیستمی سیاسی له ئێراندا دهرببڕن و خهڵك به پهی بردن به توانا و پتانسیهلهكانی كۆدهنگی و یهكریزبوونیان و هاوار كردن بۆ خواستهكانیان ئیتر و ههر سات له ئاراستهی ههدهفهكانیان دا ههوڵ دهدهن و تا بهو خواستانهشیان نهگهن، بێ دهنگ نابن.
| ||
|
|
