ماسی

 ئه‌حمه‌دی شاملو

و: عەلی ئاشناگەر

من بیر دەکەمەوە

کە هەرگیز ئاوا

دڵم بەم چەشنە گەرم و سوور نەبوە!

هەست دەکەم

لە سامناکترین کاته‌کانی

ئەم شەوە زەنگە،

چەند هەزار کانی خۆری بڕوا لە دڵمدا هەڵدەقوڵێ!

***

هەست دەکەم کە

لە گۆشە و کەناری ئەم دەشتی شۆرەکاتی ناهۆمێدی لە مێژینە دا

چەندین هەزار دارستانی سەوز دەڕوێ!

***

ئەی بڕوای ون بوو،

ئەی ماسی سەرسوڕماو لە ناو گۆلاوی تۆتۆی ئاوێنەدا!

من گۆلێکی زوڵاڵم، ئێستاکە

بە جادوی ئەوین

لە جۆباری ئاوێنەکاندا

ڕێگەیەک بەرەو من بدۆزەوە!

***

من بیر دەکەمەوە کە

لە چاوە بە فرمێسک سوور بوەکانمدا

خۆری بێ ئاوا بونی سرودێک

سەرهەڵ ئەدا!

***

هەست دەکەم

ئێستا لە گشت ڕەگەکانمدا

لە هەر لێدانێكى دڵمدا

زەنگی هەستانی کاروانێک دەبیسم!

***

شەوێکی ڕوت لە دەرگای

ماڵەکەمەوە هاتە ژور

لە چەشنی روحی ئاو!

لە سینگی‌دا دو ماسی و لە دەستیشیدا

ئاوێنەیەک

پرچی خوساوی وەک قەوزەی تێک‌هاڵاو!

من لە بارگای ناهومێدیەوە هاوارم کرد:

ئەی بڕوای وەدەست كەوتو

ئیتر لە دەستت نادەم!