به‌ هینانی ناوی ئاستافی ده‌توانن ئه‌م بابه‌ته‌ بڵاو بکه‌نه‌وه‌!!!

وته‌ی ڕۆژ

2010-02-06

كارنامه‌ی 30 ساڵه‌ی ده‌سه‌ڵات له‌ تێڕوانێكی خێرادا

دادستانی گشنیی ئێران له‌ لێدوانێكدا تیشكی خستۆته‌ سه‌ر كارنامه‌ی 30 ساڵه‌ی كۆماری ئیسلامی و له‌ وڵام به‌ پرسیارێك سه‌باره‌ت به‌ ده‌سكه‌وته‌كانی 3 ده‌یه‌ ده‌سه‌ڵاتداری كۆماری ئیسلامی ده‌ڵێت كه‌ به‌حه‌مدی خودا له‌ ماوه‌ی ئه‌م 30 ساڵه‌ی ده‌سه‌ڵاتداریدا، ئیسلامی راسته‌قینه‌ به‌جیهان ناسراوه‌ و نه‌هادینه‌ كراوه‌. موحسینی ئێژه‌یی دادستانی گشتی ئێران له‌ وتووێژێكدا له‌ گه‌ڵ هه‌واڵنێری ئیلنا له‌ درێژه‌ی وڵام به‌و پرسیاره‌دا ده‌ڵێت: "له‌م سی ساڵه‌ی دوای شۆڕش، ئیسلامی راسته‌قینه‌ جێگیربووه‌ و ئاشكرابووه‌ كه‌ سیستمی ئیسلامی وڵامده‌ره‌وه‌ی سه‌رجه‌می پێداویستی و خواسته‌كانی مرۆڤایه‌تییه‌."

له‌ راستیدا وڵامدانه‌وه‌ به‌ ئاخاوتن و قسه‌ی له‌و شێوه‌ زۆر پێویست نییه‌ و وردبوونه‌وه‌یه‌كی زۆر هاكه‌زایی و سه‌رپێیانه‌ له‌ بارودۆخه‌ سیاسی، كۆمه‌ڵایه‌تی‌و ئابوورییه‌كانی كۆمه‌ڵگا هه‌موو راستیه‌كان به‌ده‌سته‌وه‌ده‌دات. له‌به‌ر رۆشنایی ئه‌گه‌ره‌كانی كارتێكردنی چه‌واشه‌كاری له‌ زه‌ینیه‌تی به‌شێك له‌ تاكه‌كانی كۆمه‌ڵگا، خوێندنه‌وه‌یه‌كی كورت و خێرا نه‌ك بۆ كارنامه‌ی سی ساڵه‌ی كۆماری ئیسلامی، به‌ڵكوو بۆ كارنامه‌ی ئه‌م 8 مانگه‌ی ده‌سه‌ڵات ده‌توانێ زۆر له‌ راستییه‌كان به‌ده‌سته‌وه‌بدات.

به‌درێژایی ئه‌م 8 مانگه‌، وه‌ك نموونه‌یه‌كی زیندوو له‌ چه‌شنی سێ ده‌یه‌ ده‌سه‌ڵاتداری سیستمی سیاسیی له‌ ئێران، هارترین، دڕنده‌ترین‌و بێ به‌زه‌یانه‌ترین چه‌شنی ده‌سه‌ڵاتداری له‌ كۆمه‌ڵگای جیهان به‌نمایش ده‌رهات و كۆماری ئیسلامی به‌چڕكردنه‌وه‌ی كرده‌وه‌ دژه‌ خه‌ڵكییه‌كانی رووی زۆربه‌ی دیكتاتۆره‌ ناسراوه‌كانی جیهانی سپی كرد.

سه‌ره‌تایترین مافه‌كانی مرۆڤ واته‌ مافی ناره‌زایه‌تی ده‌ربڕین، كۆبوونه‌وه‌ی هێمنانه‌ و زۆر مافی دیكه‌ له‌به‌رچاوی جیهان و له‌ رێگه‌ی میدیاوه‌ پێشێلكرا و گرتن و كوشتنی شارۆمه‌ندان وه‌ك بابه‌تێكی ئاسایی بۆ ده‌سه‌ڵاتی دیكتاتۆر به‌رده‌وام دووباره‌ بۆته‌وه‌. ئه‌گه‌ر له‌ ساڵه‌كانی پێشووتر له‌ رێگه‌ی درۆ و چه‌واشه‌كاری زۆر له‌ پێشێلكارییه‌كانی مافی مرۆڤ ده‌شاردرایه‌وه‌ و ته‌نانه‌ت زۆر كه‌س و كۆمه‌ڵگای جیهان به‌ گومانه‌وه‌ له‌و راستیانه‌یان ده‌ڕوانی، ئه‌وا ئه‌م 8 مانگه‌ی رووداوه‌كانی ئێران رواڵه‌ت و واقعییه‌تی راسته‌قینه‌ی ماهییه‌تی سیستمی سیاسیی ئێرانی بۆ هه‌موو لایه‌ك ئاشكرا كرد و به‌غه‌یری ئه‌م جه‌نابانی به‌رپرس له‌ سیستمی دیكتاتۆر، هیچ كه‌س و لایه‌نێك نه‌ قسه‌ و لێدوانی ئه‌وان به‌هه‌ند ده‌گرێت و نه‌ بڕوای پێ ده‌كات. هێزه‌ چه‌كداره‌كانی كۆماری ئیسلامی له‌ چه‌شنی گشتاپۆی سه‌رده‌می ئاڵمانی نازی رۆژانه‌ به‌ ده‌یان و سه‌دان هاوڵاتی به‌ره‌و گرتووخانه‌كان په‌لكێش ده‌كه‌ن و به‌وپه‌ڕی بێڕه‌حمی و به‌دوور له‌ هه‌موو به‌ها مرۆڤایه‌تییه‌كان ئه‌شكه‌نجه‌ و ئیعدامییان ده‌كه‌ن. ده‌ستدرێژه‌ی جنسی ده‌كه‌نه‌ سه‌ر كچان و ژنانی كۆمه‌ڵگا و به‌ڵگه‌كانی ئه‌م واقعییه‌ته‌ تاڵانه‌ نه‌ك له‌ لایه‌ن به‌رهه‌ڵستكارانی كۆماری ئیسلامی، به‌ڵكوو له‌ لایه‌ن خودی دامه‌زرێنه‌ران و داڕێژه‌رانی رژیمی ئیسلامییه‌وه‌ ئاشكرا ده‌كرێن.

ئه‌وانه‌ی كه‌ باسی لێكرا ته‌نیا گۆشه‌یه‌كی بچووك له‌ كارنامه‌ی ده‌سه‌ڵاتداری كۆماری ئیسلامییه‌ و سه‌رجه‌می ته‌مه‌نی سیاسیی ئه‌م سیستمه‌ پڕ له‌ ده‌سكه‌وتی له‌مشێوه‌. كۆماری ئیسلامی ئێران  زه‌رفییه‌ت و توانای وڵامدانه‌وه‌ به‌ هیچ یه‌ك له‌ خواسته‌كانی جه‌ماوه‌ری گه‌لانی ئێرانی نییه‌ و ئه‌وه‌ی كه‌ ئه‌مڕۆ له‌ ژێر ناوی بزووتنه‌وه‌ی دیموكراسیخوازی له‌ كۆمه‌ڵگادا ئاماده‌یه‌، ده‌ره‌نجامی ئه‌م لێكدادان و به‌ریككه‌وتنی راده‌ی خواسته‌كانی جه‌ماوه‌ر و نه‌بوونی زه‌رفییه‌ته‌كانی ده‌سه‌ڵات بۆ وڵامدانه‌وه‌ به‌م خواستانه‌یه‌.